Saturday, December 09, 2006

مبروك على الهجره

.....Green Card lottery صديقتى كسبت فى
خبر هايل... كلنا بالذات كأطباء لسه شايفين ان أمريكا حل لمعظم المشاكل ....يعنى أول خطوه هتعادل شهادتك و بعدين تاخد نيابه فى مكان مش ولابد قوى يعنى... بس هتتعلم ...و كمان5 أو 6 سنين احتمال يطلع منك دكتور كويس...باالنسبه الى أنا ده يبقى شئ هايل
...كمان لو عرفت ترجع كده وانت بنى ادم محترم ولقيتلك مكان ....ياسلام....بس انا ممكن اتفهم ان حد يقرر ميرجعش خالص ....بس اللى مش فاهماه خالص بقى هو اللى هى قالتهولى...؟
أنا: مبروك ....أنا لو منك ابتدى بقى موضوع المعادله ده من هنا....و اكمل هناك بقى البوردو الحاجات دى و بعدين بقى دبلومتين ليزر و باثولوجى....يعنى بقى.
هى: حيلك حيلك انا مالى بالكلام ده كله
أنا: أمال هتمارسى ازاى
هى: و مين قالك ان انا همارس اى حاجه و لا هسافر اصلا
أنا: ؟؟؟؟؟
هى:بصى بقى يا ستى....انا كل اللى هاعمله انى هسافر بس اخد الاقامه و اظبط ورقى تمام و اقعد المده المطلوبه و انزل تانى
أنا:طب ليه؟؟؟
هى:لانى مش ناويه أهاجر و لا اقضى الخمس سنين اللى جايه عماله اذاكر
أنا : انا مش فاهمه حاجه خالص؟؟؟؟؟؟؟؟؟ يعنى انتى هتعملى ده كله ليه طيب لو مش مسافره..
هى: شوفى بقى يا ستى خليكى معايا واحده واحده...دلوقتى احنا متفقين ان بلدنا دى لها سكك و ان اللى يعرف السسكك دى يعرف ياخد حقه تالت و متلت ..صح
أنا: يوووه بقى متبقنيش انتى و المدونات متطيريش الحجرين بقى و خلى الواحد متعايش
هى :أنا بقى عرفت السكك دى و مش هاخد على قفاى تانى و هاخد حقى تالت و متلت و فوقيه تلت كمان...انا ايه اللى يخلينى بقي اروح بلد اقف فيها فى طوابير وامشى تبع قانون من الى بحق و حقيق دول
أنا: طيب يعنى اذا بلعنا اللى انتى قلتيه دلوقتى يبقى برده مسافره ليه
هى: لانى هاعمل بزنس هناك
و قعدت نص ساعه تشرحلى ازاى هتستورد مواد من اللى بنستخدمها من جنوب شرق اسيا و تاخد عليها موافقه ال اف دى ايه للاستخدام خارج الولايات المتحده -عشان ارخص كتير- و ازاى انها ساعتها هتبقى كسبانه حوالى 20 دولار فى العبوه الواحده.
يا ترى هما كل اللى لسه قاعدين فى البلد قاعدين لنفس السبب...؟

11 comments:

Mohamed A. Ghaffar said...

إجابة السؤال

أنا اعد فى البلد دى عشان واجبى انى اكون اعد فيها

بني آدم said...

طب وترجع ليه أصلا عشان 20 دولار في العلبة..........مش كفاية خالص أنا لو منها (قولي آمين)اتتجوز واهاجر واستقر وابعت لاقاربي واحد واحد لحد ما نخلص من البلد دي وقرفها وسككها وبعد كده لو رجعت ابقى جي عشان ازور الهرم ادفع الضرايب انتخب ريس نضيف ولما الحال ينصلح ابقى أرجع

minesweeper76 said...

بالإضافة لحكاية البيزنس، ناس كتير محتفظة بالجنسية الأجنبية أو الإقامة الدائمة تحسبا لأي تقلبات سياسية أو اقتصادية في مصر، ده طبعا بالإضافة للحصانة الأوتوماتيكية التي يتمتع بها كل من يحمل جواز سفر أجنبي على أرض مصر المحروسة، حتى لو كان إسمة مخيمر.

أما حكاية أسيب البلد و ابقى أرجع لما الحال ينصلح، فطالما أن الغالبية العظمى "للإصلاحيين" يفكرون بهذه الطريقة فمن سيتبقى منهم سيصلحون - بالكاد - بوابير جاز.

elgharep said...

مش عارف أقول أيه مبروك ولا ليه كده يابنى
أمريكا أمريكا بقت صعار لكل الناس
وبالنسبة للناس اللى عايزة تاخد البورد الأمريكى
أذا كنت ناوى تعيش فى بلد العم سام أو تشتغل فى الخليج فخد البور أما أذا كنت ناوى تاخدها نزاهة وفنقهه أهو هوا ده اللى يغيظ
الغريب

451 فهرنهايت said...

اغواء البيزنس والورق الاخضر مالهوش حل .... طب بالذمة ايه اللي يجبرها على قرف الدراسة والسكك الطويلة ووجع القلب مادام ممكن تحصل على الخبز (أو ماهو اكثر) ... بدون هذه المسالك الطويلة
وليه نتعب اكتر لما ممكن نتعب اقل؟

والله لاأحد يلام على تفكيره ... امال احنا مستنيين ايه ياجماعة اذا كانت الحياة سالكة كدة في بلاد برة الغارقة في عسل الدولارات؟

الظاهر ان الواحد غاوي فقر

يلا ... كل سنة وانت طيبة .. وشكرا ليكي تاني
:)

Anonymous said...

معلش يا بني ادم هي البلد دي عمرها ما هتنصلح ولا هتتعدل الا بينا احنا لو كل واحد فكر كدا صدقني مش هنلاقي بلد ولا فلوس الدنيا هتشتريلك بلد----------انت عارف اللي بيتكلم معاك دا عنده كام سنه 32 سنه ومحاسب والشركه اللي كنت فيها صفت من شهرين ومش لاقي شغل ---------عشان ماتقلش اني مظبط حالي بس والله البلد دي مافيش اغنى ولا احلى منها شوف بقالها كام سنه بتتسرق ولاقيين ناكل بذمتك في بلد بالجمال دا ثم هنسيبها ليهم ونهاجر ماهما عايزين كدا

i`m just depressed said...

اكثر حاجه دايقتنى بجد انها جايلها فرصه تتعلم صح و تعمل من نفسها حد كويس و تنسى كل ده و تبص على الفلوس
صحيح الفلوس حلوه قوى بس كمان 20 سنه هتقول لولادها انا كنت فى يوم من الأيام بدرس وكبرت دماغى عشان اعمل بيزنس و اجيب فلوس
انا مش ضد السفر و لا حتى الهجره بس لما يبقى السبب عليه الطلب مش عشان فلوس ماهى ممكن تقعد هنا و تدور على حاجه تجيب منها فلوس و تنسى العلم والى اتعلموه وتنسى ان فيه ناس ممكن تموت نفسها عشان تكون فى مكانها و تاخد فرصه زيها
و عجبىىىىىىىىىىىىى

No Fear said...

السلام عليكم
أنامش فاهم أي حاجة بس ربنا يوفقها
سلام

أحمد الشمسي said...

أولا أنا مش عارف ليه انتي قلتي ان أمريكا بالنسبة للأطباء هي الحل! أقصد انتي افترضتي افتراض واعتبرتيه صحيح بالنسبة للكل. أنا اعرف هنا في سوهاج دكاترة ما راحوش امريكا وهم صغيرين لكن ماشاء الله دلوقتي بيروحوها كل يومين على سبيل "الفسحة" وكل ما حد يوقله له على حاجة يقول: هابقى اجبها لما اروح أمريكا! النجاح محتاج هنا شوية صبر... ومرارة سليمة... بس!

ثانيا: معلش سامحيني بس ده تفكير مريض، الفلوس ممكن تعلمها بعد كام سنة وأكثر من كده لو هي اهتمت بمستقبلها، مش عارف ليه الناس مش مقتنعة بفايدة المشروعات طويلة الأجل؟ انصحيها انها تستثمر في نفسها... ده هيجبلها قدام فلوس أكتر!

بنـت ســعد said...

ههههههههههه

سبب وجيه للهجرة

انا نفسي اعمل زى رفيق الحريرى الله يرحمه صراحة

سافر لحد ما بقه حاجة كبيرة

و بعدين رجع بلده و صلح فيها

Amira Hassan said...

انا بحب السفر جدا..بس السفر المؤقت مش الهجرة..يعني مقدرش اخد بعضي و اوقل اني مش راجعة مصر تاني..و ده لسبب-وممكن محدش يصدقني- عاطفي جدا..انا مقدرش اصحى من النوم انزل مشمفش شوارع حدايق القبة و مركبش المترو و اتزل وسط البلد اقعد اشيش مع لميا على البورصة و استنيى حبيبي على ما ينزل من شغله..فقرية ممكن..بس هو ده احساسي فعلا..بس غالبا اكتر اللي قاعدين فيها عشان مش لاقيين حل تاني