Sunday, August 06, 2006

شهر فى بؤره الجحيم

الحقيقه ان ده مش اسم عدد رجل المستحيل الجديد ولا فيلم لناديه الجندى و الحقيقه برده ان الجحيم ده مكانش اى حته الا بيتنا. كانت فى زيارة بيتنا العامر احد المهاجرين اللى سابوا مصر بعد النكسه . و هى كانت جت مره و لا مرتين لغرض معين لا يستمر اكثر من اسبوعين و مشيت .انما بقى المره دى كانت نفسيتها تعبانه شويه هناك و حاولت تعالج ده بكل الطرق .. تتعلم حاجات جديده مش نافع ....تتعلم يوجا مش نافع... .الست حتى صامت عن الكلام برده مافيش فايده... كانت مكتئبه جدا.تعمل ايه... تعمل ايه... قالتلك انزل مصر و اهو اشوف أهلى و اتفسح شويه و انسى مشاكلى...طبعا اطمنوا هى عرفت غلطها من اول يوم و غالبا من اول ساعه يعنى فى الطريق و هى راجعه من المطار ....اللى كان يشوفها و هى راكبه العربيه يفتكرها راكبه الرولر كوستر فى الملاهى...طب سيبك من السواقه .قديمه و عارفينها ...جينا نركن شافت بقى الناس و هى بتقطع بعضها على الركنه...دخلت بقى البيوت و كل واحد جتله نوبة فضفضه مش عارفين نلمها ...انت يا حبيبى متجوزتش ليه انت عندك 32 سنه...أصل يا طنط الشاب اللى يوصل 25 سنه و ميحتكمش على ربع مليون يبقى فاشل ..وانتى ياحبيبتى خلصتى كليه و بقيتى دكتوره ايه أخبار الشغل ....لا يا طنط انا مبشتغلش أصلهم أنهوا تكليفى...طب و انت بقاللك 30 سنه فى الخليج و مش عايش مع مراتك و اولادك و بعدين...لأ ماهو أصل البلد مفيهاش فلوس...وبعدين الدنيا زحمه كده ليه...لا اطمنى مظاهرات ده كل يوم تقريبا....ولا النكته آل يعنى العمليه ناقصه موبينيل عشان يعنى يرحبوا بيها بعتولها رساله يتمنوا انها تستمتع بخدمة التجوال معاهم ...شئ ظريف..كان كده فعلا أول 10 مرات لكن بعد ما عدوا 30رساله بواقع واحده كل تلت ساعه الست اتخنقت و كلمتهم قالولها انتى متضايقه ليه انتى مبتدفعيش حاجه...و احنا كمان غلطنا لما جينا ندخلها سينما... احنا قلنا اى حاجه غير عمارة يقوبيان آل دخلناها واحد من الناس.
شويه و الحرب قامت..لا يا طنط اطمنى ما فيش ملاجئ.... شويه والبنزين غلى..متقلقيش يا طنط ده عشان مشكلة السواقه...لأ و الا لما افتكرت باسبورها ضاع (الاجنبى طبعا) الست كانت هتروح فيها...لحسن معرفش امشى من هنا.... المهم الست امبارح وقبل معاد الطياره بخمس ساعات حطت ديلها فى اسنانها و جريت على بلدهم.

6 comments:

أحمد said...

و الله احسن ريحت و ارتاحت

451 فهرنهايت said...

يعني عايزة تقولي انها قعدت شهر كامل فعلا !!!؟
استحملت ازاي طيب؟

placebo said...

هوعشان ارد عليك يبقى لازم احكيلك هى اصلا جت ليه...بس هو من الاخر هى فعلا كانت بتفكر تمشى بدرى بس لما جوزها اقترح كده عدلت عن رايها

Maxxed`ouT said...

من خرج من داره

زنفل المعجباني said...

الطبع يغلب التطبع
أنا واثق إن أي حد فينا بيكون في صحبة حد بالمنظر ده بيحس إنه بيشوف البلد من منظور جديد و مختلف ممكن يكون إنتقادي أو معجب إنما جديد
البوست ده بيصحينا على قد إيه مجتمعنا إتبدل خلال جيلين حتى من منظور غربي
ده يؤكد إننا بنفقد هويتنا بالتدريج زي الغراب اللي لا هو قادر يقلد مشية الطاووس و لا قادر يمشي مشيته اللي إعتاد يمشيها
أسترها يا كريم

Dr Haisook said...

Haha... funny post!
Who visits Egypt on his/her full own will just deserves what we wear in our feet! --used English to make it less disturbing :)